Sport huquqshunosi: UEFA FIFA ustidan sudga murojaat qilishi mumkin
Sport huquqi bo‘yicha mutaxassis Jan-Lui Dyupon FIFAning Jahon chempionati va boshqa yirik musobaqalarning tijoriy huquqlarini xususiy investorlarga qisman sotish rejasi yuzasidan UEFA sudga murojaat qilishi mumkinligini aytdi. Uning fikricha, bu tashabbus Yevropa Ittifoqining raqobat qonunchiligiga zid bo‘lishi ehtimoldan xoli emas.
Dyuponning ta'kidlashicha, agar FIFA mazkur loyihani UEFA va boshqa manfaatdor tomonlar bilan yetarli darajada kelishmasdan amalga oshirsa, bu huquqiy mojaroga sabab bo‘lishi mumkin. Uning fikricha, UEFA ushbu masalani Yevropa sudlarida ko‘rib chiqishni talab qilish huquqiga ega.
Avvalroq UEFA va unga a'zo 55 ta milliy assotsiatsiya FIFAning ushbu rejasini bir ovozdan rad etib, Jahon chempionati futbol merosi ekanini va uni investitsiya mahsulotiga aylantirish mumkin emasligini ta'kidlagandi. Tashkilot, shuningdek, FIFA rejasidan voz kechmasa, uning musobaqalarini boykot qilishini ham ma'lum qilgan.
