Sobiq “Atletiko” futbolchisi Meksikada tahdidlarga uchradi
Madridning “Atletiko” klubi sobiq hujumchisi Anxel Korrea Meksikada jiddiy bosim va tahdidlarga duch keldi.
Jurnalist Alan Falabrinoning xabariga ko‘ra, argentinalik futbolchi “River Pleyt”ga o‘tishga yaqin turgan va aynan shu sabab “Tigres” muxlislarining tahdidlaridan so‘ng Meksikani tark etishga majbur bo‘lgan.
Manbaga ko‘ra, “Tigres” rahbariyati transfer shartlarini so‘nggi daqiqalarda o‘zgartirgan. Shu bois kelishuv barbod bo‘lishi mumkin. Agar transfer amalga oshmasa, Korrea klub bilan shartnomasini bekor qilishga urinishi aytilmoqda.
Eslatib o‘tamiz, Anxel Korrea 2015–2025-yillar oralig‘ida “Atletiko” safida 444 ta uchrashuv o‘tkazib, 85 ta gol urgan. U klub bilan La Liga, Yevropa Ligasi va UEFA Superkubogida g‘olib chiqqan. Shuningdek, Argentina terma jamoasi bilan 2022-yilgi Jahon chempionati g‘olibiga aylangan.
