Shotlandiyada hakam muxlisga qizil kartochka ko‘rsatdi
Shotlandiyada noodatiy holat qayd etildi — futbol uchrashuvi davomida hakam muxlisga qizil kartochka ko‘rsatdi. Bu haqda The Sun nashri xabar bermoqda.
Voqea Shotlandiya Ikkinchi ligasi doirasida «Edinburg Siti» va «Sterling Albion» klublari o‘rtasidagi bahsda, «Medoubank» stadionida yuz berdi. Uchrashuv davomida muxlislardan biri tribunada baland ovozda shovqin ko‘tarib, tartibsizlik qilgan. O‘yinning 86-daqiqasida bosh hakam Josh Xey vaziyatga befarq qolmay, tribunaga yaqinlashdi va muxlisga qizil kartochka ko‘rsatdi.
Mazkur holat stadiondagi boshqa tomoshabinlarni hayratda qoldirdi. Voqea ijtimoiy tarmoqlarda tezda muhokama markaziga aylandi. Ko‘plab foydalanuvchilar bu vaziyatni hazilga olib, hatto ayrimlar qarorning «qonuniyligini» aniqlash uchun VAR’dan foydalanishni taklif qilishdi.
