Sheyx Mansur o‘zbek futbol klubini sotib olishi mumkin
Sheyx Mansurga tegishli va dunyo bo‘ylab bir qancha klublarga egalik qiluvchi City Football Group xoldingi O‘zbekiston futbol bozoriga qiziqish bildirmoqda. Bu haqda mamlakat Olimpiya qo‘mitasi raisining o‘rinbosari Ravshanbek Umarov ma’lum qildi.
Uning so‘zlariga ko‘ra, O‘zbekiston hukumatiga mahalliy futbol klublaridan birini City Group vakillariga sotish bo‘yicha taklif kelib tushgan.
“Taklif yaqinda keldi. Hozirda u hukumat darajasida ko‘rib chiqilmoqda”, — dedi Umarov.
Bundan tashqari, City Group yana bir o‘zbek futbolchisini “Manchester City”ga olib o‘tishni rejalashtirmoqda. Hozircha qaysi futbolchi haqida gap ketayotgani ma’lum emas.
Ma’lumot uchun, City Football Group Angliya, Fransiya, Ispaniya, Braziliya, Belgiya, Avstraliya, Urugvay, Yaponiya, Hindiston va boshqa bir qancha mamlakatlarda jamoalarga egalik qiladi. Agar kelishuv amalga oshsa, O‘zbekiston ushbu global futbol loyihasining navbatdagi manziliga aylanishi mumkin.
