Shaxmat Olimpiadasida Isroilning ikki jamoasiga texnik mag‘lubiyat yozildi
Samarqandda davom etayotgan 46-Butunjahon shaxmat Olimpiadasida Isroilning erkaklar va ayollar terma jamoalari 6-tur uchrashuvlarida ishtirok etmadi. Bunga yahudiylarning Yom-Kippur diniy bayrami sabab bo‘ldi. Natijada har ikki jamoaga 0:4 hisobida texnik mag‘lubiyat yozildi.
Isroil erkaklar terma jamoasi Niderlandiyaga, ayollar jamoasi esa Bolgariyaga qarshi dona surishi kerak edi. Isroil tomoni uchrashuvlarni Toshkent vaqti bilan 19:30 dan keyin yoki dam olish kuniga ko‘chirishni taklif qilgan, biroq raqib jamoalar bunga rozi bo‘lmagan. Shundan so‘ng Isroil vakillari 6-tur o‘yinlariga kelmagan.
Qiziq tomoni, 5-turda Isroilning raqiblari — erkaklar bahsida Singapur, ayollar o‘rtasida esa Kolumbiya — uchrashuv vaqtini o‘zgartirishga rozi bo‘lgan edi. FIDE o‘sha bahslarni odatdagi jadvaldan oldinroq, alohida joyda o‘tkazgan va shu tariqa Isroil shaxmatchilariga Yom-Kippurni nishonlash imkoniyati yaratilgan.
Ma’lumot uchun, 46-Butunjahon shaxmat olimpiadasi Samarqandda 15–27-sentabr kunlari bo‘lib o‘tadi. Musobaqa 11 turdan iborat. O‘zbekiston turnirda uchta erkaklar va uchta ayollar terma jamoasi bilan ishtirok etmoqda.
