Senesi yozda «Bornmut»ni tark etadi
Argentina terma jamoasi himoyachisi Markos Senesi yozda "Bornmut" klubini tark etadi. Bu haqda jamoaning rasmiy sayti xabar berdi.
Klub bayonotida ta’kidlanishicha, Senesining shartnomasi yakuniga yetishi munosabati bilan jamoani tark etadi va shu tariqa Angliyaning janubiy sohillarida o‘tgan to‘rt yillik faoliyatiga nuqta qo‘yadi. U 2022 yilda "Feyenord" jamoasidan "Bornmut"ga ko‘chib o‘tgan va shu vaqt davomida klub tarixidagi eng muvaffaqiyatli davrlardan birida asosiy figuraga aylangan.
Markaziy himoyachi "Bornmut" safida jami 124 ta o‘yin o‘tkazib, jamoaning Angliya Premyer-ligasidagi mavqeini mustahkamlashda muhim rol o‘ynadi.
Senesi o‘z chiqishida quyidagilarni ta’kidladi:
"Bu klubga kelgan ilk kunimdan boshlab o‘zimni uyimdagidek his qildim. So‘nggi to‘rt yilda erishgan yutuqlarimizdan faxrlanaman va muxlislarning doimiy qo‘llab-quvvatlovi uchun minnatdorman.
"Bornmut" har doim yuragimda o‘zgacha o‘rin tutadi. Bu yerda o‘tgan vaqtlarni iliq xotiralar bilan eslayman. Hozir mavsum oxirigacha yana ikki muhim o‘yin bor va jamoa bilan birga yana nimaga erisha olishimizni intizorlik bilan kutyapman", — dedi Senesi.
