“Selta” Altay Bayindirni sotib olish huquqi bilan ijaraga oladi
“Manchester Yunayted” darvozaboni Altay Bayindir faoliyatini Ispaniyaning “Selta” klubida davom ettirishi mumkin.
Insayder Fabritsio Romano ma’lumotiga ko‘ra, 28 yoshli turkiyalik darvozabonga Ispaniyaga borib, tibbiy ko‘rikdan o‘tish va shartnoma imzolash uchun ruxsat berilgan. Tomonlar mavsum oxirigacha ijara bo‘yicha kelishuvga erishgan.
“Selta” futbolchining maoshini to‘liq to‘lab beradi. Shartnomaga Bayindirni 4 million yevroga sotib olish huquqi ham kiritiladi. Ushbu summa darvozabon o‘tkazadigan uchrashuvlar soniga qarab o‘zgarishi mumkin.
Bayindir 2023-yilda “Fenerbahche”dan “Manchester Yunayted”ga o‘tib, klub tarixidagi ilk turkiyalik futbolchiga aylangandi. U ingliz jamoasi safida jami 17 ta uchrashuv o‘tkazgan, biroq asosiy tarkibdan muqim joy ola olmadi.
