Samir Nasri «Benfika» — «Real» uchrashuvidan soʻng yuzaga kelgan mojaroda Vinisiusni qoʻllab-quvvatladi
«Arsenal» va «Manchester Siti» klublarining sobiq yarim himoyachisi Samir Nasri YChL pley-off bosqichi doirasidagi «Benfika» — «Real» (0:1) uchrashuvidan so‘ng yuzaga kelgan mojaroda Vinisius Juniorni qo‘llab-quvvatladi. Nasri lissabonliklar ustozi Joze Mourinyuning futbolchini provokatsiyada ayblaganini keskin qoraladi.
«Futbolchini 90 daqiqa davomida hushtakbozlik bilan kutib olishsa-yu, u gol urishni xohlasa... Buning ustiga buni Mourinyu gapirmoqda. Joze «Inter» bilan «Barselona»ni mag‘lub etganida, kataloniyaliklar stadioni bo‘ylab yugurib chiqqandi. «Manchester Yunayted»dagi g‘alabalarni nishonlaganda esa maydonda xuddi Tieri Anridek 20 metr tizzasida sirpanib yurgandi. Sizning bunday gapirishga haqqingiz yo‘q», — dedi Nasri Canal+ efirida.
Eslatib o‘tamiz, Vinisius uchrashuvning 50-daqiqasida golini burchak bayrog‘i yonida raqsga tushib nishonlagani uchun sariq kartochka bilan jazolangan edi. Mourinyu braziliyalik futbolchining bu harakatini portugaliyalik muxlislarni ataylab g‘azablantirish deb baholagan.
