Saloh: «Klub menga koʻplab vaʼdalar bergandi, lekin ularni bajarmadi»
«Liverpul» vingeri Muhammad Saloh Angliya Premer-ligasining 15-turida «Lids Yunayted»ga (3:3) qarshi o‘yindan so‘ng jamoadagi o‘z pozitsiyasidan norozi ekanini bildirdi.
Eslatib o‘tamiz, misrlik futbolchi shu yil bahorida «Liverpul» bilan shartnomasini 2027 yilgacha uzaytirgan edi. Joriy mavsumda esa u boshlangʻich tarkibda kamroq maydonga tushmoqda: oxirgi uchta o‘yinda Saloh zaxirada qolgan.
«Ushbu yoz klub ko‘plab va’dalar berdi, ammo men allaqachon uchta o‘yinni zaxirada o‘tkazdim. Ular va’dalarini bajargan deyish qiyin», – deya Salah so‘zlarini keltiradi VG.
Eslatib oʻtamiz, avvalroq matbuotda Salohning Yaqin Sharqqa o‘tishni rad qilgani haqida xabarlar tarqalgan. Misrlik futbolchi Saudiya Pro-Ligasiga o‘tganida 500 million yevrodan oshiq daromad olishi mumkin edi.
