Saloh Jerrardga yetib oldi
«Liverpul» qanot hujumchisi Muhammad Saloh Angliya Premyer-ligasining 33-turi doirasidagi «Everton»ga qarshi bahsda o‘zini ko‘rsatishga muvaffaq bo‘ldi. U mazkur uchrashuvda bitta gol urishga erishdi.
Shu tariqa, misrlik futbolchi mersisayd derbisida kiritilgan gollar soni bo‘yicha «Liverpul» sobiq sardori Stiven Jerrardning rekordini takrorladi. Bu haqda OptaJoe xabar bermoqda.
Saloh ham, Jerrard ham «Everton» darvozasini jami 9 bor ishg‘ol etishgan. Ta’kidlash joizki, misrlik vinger o‘zining so‘nggi Liverpul derbisini o‘tkazmoqda. Avvalroq futbolchi mavsum yakunida jamoani tark etishini e’lon qilgan edi.
Saloh 2017 yildan buyon «Liverpul» sharafini himoya qilib keladi. O‘tgan davr mobaynida 33 yoshli hujumchi barcha turnirlar doirasida 439 ta o‘yinda maydonga tushib, 257 ta gol va 122 ta golli uzatmani o‘z hisobiga yozdirib qo‘ygan.
