Rossiya Premyer-ligasida ilk bor o‘zbekistonlik futbolchi qolmadi
Rossiya chempionatlari tarixida ilk bor Premyer-ligada ham, Birinchi ligada ham o‘zbekistonlik futbolchi qolmadi.
Abbosbek Fayzullaev hali rasmiy ravishda CSKA a’zosi bo‘lib turgan bo‘lsa-da, u jamoa bilan mashg‘ulotlarni Turkiyada olib bormoqda. Uning ortidan esa “Akron” jamoasi Sherzod Esanov bilan xayrlashdi — shu bilan Rossiyaning ikki yuqori divizionida ham yurtdoshimiz qolmadi.
Ikkinchi liga va undan past divizionlarda esa legionerlarga taqiq mavjud. Media-futbol jamoalarida o‘zbekistonliklar (masalan, Vitaliy Denisov) uchrasa-da, bu liga hozircha professional maqomga ega emas.
Transfermarkt ma’lumotlariga ko‘ra, 1992 yildan beri har mavsum Rossiyaning yuqori ligasida kamida ikki nafar o‘zbekistonlik futbolchi to‘p surgan. Eng “kam” mavsum — 1997 yil bo‘lgan, o‘shanda RPLda faqat Sergey Luschan va Andrey Rezantsev, ikkinchi divizionda esa Maksim Shatskix harakat qilgan.
Shu bilan birga, 2024 yil tarixiy debyutlar bilan esda qolmoqda: o‘zbekistonlik futbolchilar ilk bor Angliya va Belgiya chempionatlarida harakat qilmoqda, yaqin kunlarda Ispaniyada ham debyut kutilmoqda.
