Rosenyor nega isteʼfoga chiqarilgani maʼlum boʻldi — manba
Jurnalist va insayder Ben Jeykobs «Chelsi» bosh murabbiyi Liam Rosenyorning iste’fosi yuzasidan o‘z fikrlari bilan bo‘lishdi.
«Chelsi» rahbariyati yevrokuboklarga yo‘llanma olish va Angliya kubogida g‘olib chiqish uchun bu yagona chora degan qarorga kelgan. Manbalarning xabar berishicha, bir qator yetakchi futbolchilar murabbiyga bo‘lgan ishonchini yo‘qotgan. Klub yangi murabbiy izlash jarayonini o‘ta sinchkovlik bilan o‘tkazishi kutilmoqda, chunki shu yozda bozorda bir nechta yuqori malakali erkin agent murabbiylar paydo bo‘lishi «aristokratlar»ga ma’lum.
Hozirda asosiy e’tibor barqarorlikni ta’minlash va mavsumni kuchli yakunlash uchun eng yaxshi sharoitlarni yaratishga qaratilgan. Futbolchilar va xodimlar bu qaror haqida rasmiy e’londan avval xabardor qilingan.
Qaror klub rahbariyati tomonidan qabul qilindi. Manbalarga ko‘ra, nafaqat Rosenyorning tayinlovida, balki butun mavsum davomida yo‘l qo‘yilgan ayrim xatolar tan olingan va yangi murabbiy bilan shartnoma imzolashdan oldin kerakli xulosalar chiqarilgan», — deb yozdi Jeykobs o‘zining X ijtimoiy tarmog‘idagi sahifasida.
Eslatib o‘tamiz, 22 aprel kuni «Chelsi» Liam Rosenyorni iste’foga chiqarganini rasman e’lon qildi. Angliyalik mutaxassis joriy yilning yanvar oyida «Strasburg»dan London klubiga o‘tgan edi. Tomonlar o‘rtasidagi kelishuv 2032 yilga qadar mo‘ljallangan edi.
