\"Roma\" yangi mavsum uchun bosh murabbiy izlashda davom etmoqda — to'rt nomzod muhokamada
Italiyaning "Roma" klubi yangi mavsum oldidan bosh murabbiy lavozimiga nomzodlar ro'yxatini shakllantirmoqda. Asosiy da'vogar sifatida hozirda "Komo" jamoasini boshqarayotgan ispaniyalik mutaxassis Sesk Fabregas ko'rilmoqda. Undan tashqari, bosh murabbiylikka yana uch nomzod muhokama qilinmoqda: "Ayaks"ni boshqarayotgan Franchesko Farioli, "Jenoa" ustoz Patrit Viyera va Saudiya Arabistonining "Al-Nasr" jamoasi murabbiyi Stefano Pioli.
Eslatib o'tamiz, joriy mavsumda "Roma"ni boshqarayotgan Klaudio Raneri yozda murabbiylik faoliyatini tugatishini ma'lum qilgan edi. Ayni paytda rimliklar A Seriya jadvalida 60 ochko bilan oltinchi o'rinni egallab turibdi. "Roma"ning navbatdagi uchrashuvi 4 may kuni soat 23:00da Toshkent vaqti bilan "Fiorentina"ga qarshi bo'lib o'tadi.
