Rodri hakamlik haqida bildirgan tanqidiy fikrlari uchun katta miqdorda jarimaga tortildi
«Manchester Siti» yarimhimoyachisi Rodri Angliya Premer-ligasining 24-turi doirasida «Tottenhem»ga qarshi o‘yindan (2:2) so‘ng hakamlik borasida bildirgan tanqidiy fikrlari uchun jarimaga tortildi. Angliya futbol assotsiatsiyasi (FA) futbolchini 80 ming funt sterling (taxminan 92 ming yevro) miqdorida jarimaga tortdi.
Bugun, 9 mart kuni ma’lum qilinishicha, mustaqil sud majlisida Rodri o‘z aybiga iqror bo‘lgan va shu sababli diskvalifikatsiyadan qutulib qolgan.
O‘yindan keyingi intervyusida futbolchi quyidagicha fikr bildirgan edi:
«Biz juda ko‘p g‘alaba qozonmoqdamiz va odamlar bizning yutishimizni xohlamaydi. Biroq hakam neytral bo‘lishi kerak. Ochig‘ini aytganda, bu adolatsizlik, shunchaki adolatsizlik».
Ushbu so‘zlar hakamning xolisligini shubha ostiga olgani bois intizomiy ish qo‘zg‘atilishiga sabab bo‘ldi. Futbol assotsiatsiyasi bayonotida qayd etilishicha, Rodri o‘z intervyusi vaqtida nomaqbul xatti-harakat qilib, hakamning tarafkashligini nazarda tutuvchi hamda uning halolligini shubha ostiga qo‘yuvchi izohlar bergan.
Jarimadan tashqari, yarimhimoyachiga kelgusida bunday bayonotlar bermasligi bo‘yicha qat’iy ogohlantirish berildi.
