Rodri: «Bizni gʻalaba qozonishimizni xohlashmayapti»
«Manchester Siti» yarimhimoyachisi Rodri APLning 24-turi doirasida kechgan «Tottenhem»ga qarshi bahsdan (2:2) so‘ng bosh hakam Robert Jonsning qarorlarini keskin tanqid ostiga oldi.
Eslatib o‘tamiz, «shaharliklar» o‘yin davomida 2:0 hisobida oldinda borayotgan edi, biroq yakunda g‘alabani qo‘ldan boy berishdi.
Rodri ayniqsa mezbonlarning birinchi goli qoidabuzarlik evaziga kiritilgan deb hisoblamoqda.
«Hakamlar birinchi gol vaziyatida qo‘pol xatoga yo‘l qo‘yishdi – uni hisobga olish kerak emas edi. O‘ylaymanki, bu voqea bizning o‘yinimizga juda salbiy ta’sir ko‘rsatdi.
Men hech qachon hakamlar haqida gapirmayman, ularning ishini hurmat qilaman... Lekin bu ketma-ket ikkinchi yoki uchinchi o‘yindirki, bunday xatolar nega yuz berayotganini tushunmayapman. Bilaman, biz juda ko‘p g‘alaba qozondik, odamlar endi yutishimizni xohlashmayapti, lekin hakam neytral bo‘lishi shart. Bu adolatdan emas», — dedi Rodri Sky Sports nashriga.
Maʼlumot uchun, «Manchester Siti» 47 ochko bilan turnir jadvalida ikkinchi o‘rinda qolmoqda. Peshqadam «Arsenal» esa 53 ochko bilan oraliq masofani 6 ochkoga yetkazib oldi. «Tottenxem» 29 ochko bilan 14-pog‘onani egallab turibdi.
