Robert Levandovski: «Maqsadimiz — 100 ochko jamg‘arish»
«Barselona» hujumchisi Robert Levandovski jamoasining Ispaniya chempionatidagi joriy mavsum uchun asosiy maqsadini ochiqladi. Shanba kuni, 2 may sanasida bo‘lib o‘tgan La Liganing 34-tur uchrashuvida «ko‘k-anorranglilar» «Osasuna» ustidan 2:1 hisobida g‘alaba qozondi. Polshalik forvard 81-daqiqada uchrashuvdagi hisobni ochishga muvaffaq bo‘ldi.
«Maqsadimiz — barcha o‘yinlarda g‘alaba qozonib, 100 ochko to‘plash. Hatto La Ligada chempionlikni muddatidan avval naqd qilsak ham, qolgan barcha bahslarda g‘alaba qozonishimiz shart», — dedi Levandovski.
Ma’lumot o‘rnida, 34-turdan so‘ng «Barselona» hisobida 88 ochko mavjud. Ikkinchi pog‘onada esa bitta zaxira o‘yiniga ega bo‘lgan Madridning «Real» klubi 74 ochko bilan bormoqda. Eslatib o‘tamiz, Ispaniya chempionati 38-turda yakuniga yetadi.
