«Renn» «Sanderlend» hujumchisi Eliyezer Mayenda transferini rasman e’lon qildi
Fransiyaning «Renn» klubi o‘zining rasmiy saytida Angliyaning «Sanderlend» jamoasidan Ispaniya yoshlar terma jamoasi forvardi Eliyezer Mayendani sotib olganini ma’lum qildi.
Iste’dodli futbolchi o‘zining yangi jamoasi bilan shartnoma imzoladi. Unga ko‘ra, tomonlar o‘rtasidagi mehnat kelishuvi 2031-yilning yoziga qadar amal qilishi belgilangan.
Ma’lumot o‘rnida, Eliyezer Mayenda Ispaniya va Fransiya futbol maktablari tarbiyalanuvchisi hisoblanadi. Hujumchining faoliyati davomida «Sosho» hamda Shotlandiyaning «Xibernian» klublari safida ham to‘p surgan. Ortda qolgan mavsumda u barcha turnirlar doirasida 24 ta o‘yinda maydonga tushib, 2 ta gol urishga va 1 ta golli uzatmani amalga oshirishga muvaffaq bo‘ldi. Transfermarkt portali ma’lumotlariga ko‘ra, Mayendaning ayni damdagi bozor bahosi 16 million yevroni tashkil etmoqda.
Eslatib o‘tamiz, «Renn» klubi ortda qolgan 2025/2026-yilgi mavsum yakunlariga ko‘ra, Fransiya Liga 1 turnir jadvalida oltinchi o‘rinni band etgan edi.
