Renatu Sanches “Xetafe” bilan muzokara olib bormoqda
Portugaliyalik yarim himoyachi Renatu Sanches faoliyatini Ispaniya chempionatida davom ettirishi mumkin. 29 yoshli futbolchi hozirda “Xetafe” bilan muzokara olib bormoqda va aynan shu variantni o‘zi uchun ustuvor deb hisoblamoqda.
Sanches yozda PSJ bilan shartnomasini muddatidan oldin bekor qilgan va hozirda erkin agent hisoblanadi. Manbaga ko‘ra, u MLS, Saudiya Arabistoni va Braziliya klublaridan tushgan takliflarni rad etib, faoliyatini Yevropada davom ettirishni istamoqda.
Futbolchiga avvalroq “Chelsi” va “Lill” ham qiziqish bildirgan. Biroq Sanches hozirda La Ligada o‘ynash imkoniyatini ma’qul ko‘rmoqda va tomonlar o‘rtasida muzokaralar davom etmoqda.
Ma’lumot uchun, Sanches o‘tgan mavsumni ijara asosida “Panatinaikos”da o‘tkazdi. U Gretsiya chempionatida 14 ta uchrashuvda maydonga tushib, 1 ta gol va 1 ta golli uzatma qayd etdi.
