“Real”ning 18 yoshli futbolchisi Mourinyuni hayratda qoldirdi
Madridning “Real” klubi tarbiyalanuvchisi Aleksis Siriya mavsumoldi tayyorgarlik jarayonida bosh murabbiy Joze Mourinyu va uning yordamchilarida katta taassurot qoldirdi. 18 yoshli vinger jamoaning yozgi yig‘inidagi asosiy kashfiyotlardan biri bo‘lib turibdi.
Diario AS ma’lumotiga ko‘ra, “Real” murabbiylar shtabi yosh ispaniyalik futbolchining texnikasi va raqibdan cho‘chimay o‘ynashini yuqori baholamoqda. Klubda Siriya kelajakda asosiy jamoada o‘zini ko‘rsatish uchun yetarli salohiyatga ega deb hisoblanmoqda.
Aleksis yil boshida “Sevilya” akademiyasidan “Real” safiga qo‘shilgan edi. U yangi klubiga tez moslashib, yoshlar jamoasidagi o‘yinlari bilan e’tibor qozondi. Avvalroq AS futbolchini Madrid klubining istiqbolli yosh iqtidorlaridan biri sifatida ta’riflagan.
Mavsumoldi uchrashuvlarida ham Siriya o‘zini ko‘rsatishga ulgurdi. U “Fiorentina”ga qarshi o‘rtoqlik bahsida gol urgan, “Ferensvarosh” bilan uchrashuvda esa golli uzatma amalga oshirgan. Endi yosh vingerning o‘yinlari Mourinyu e’tiboriga tushgani sabab uning asosiy jamoada imkoniyat olish ehtimoli oshmoqda.
