“Real” Vinisiusga ultimatum qo‘ydi, “Arsenal” vaziyatni kuzatmoqda
Madridning “Real” klubi braziliyalik hujumchi Vinisius Juniorga shartnomani uzaytirish bo‘yicha qat'iy talab qo‘ydi. MARCA xabariga ko‘ra, futbolchi klubning yangi taklifini qabul qilishi kerak, aks holda yozgi transfer oynasi yopilishidan oldin transferga chiqarilishi mumkin.
Manbaga ko‘ra, “qirollik klubi” Vinisiusning shartnomasi yakunlanishiga yaqinlashib qolishini istamayapti. Shu sabab rahbariyat futbolchi bilan muzokaralarni tezroq yakunlashni maqsad qilgan. Agar tomonlar kelisha olmasa, “Real” uni bepul yo‘qotish xavfini oldini olish uchun sotishga tayyor.
Ayni paytda vaziyatni Angliyaning “Arsenal” klubi diqqat bilan kuzatmoqda. Londonliklar Vinisiusning holatini nazorat qilmoqda, biroq hozircha “Real”ga rasmiy taklif yubormagan.
Qayd etilishicha, yaqin kunlarda Vinisius vakillari va “Real” rahbariyati o‘rtasida navbatdagi muzokaralar bo‘lib o‘tadi. Mazkur uchrashuv futbolchining kelajagini hal qiluvchi bosqich bo‘lishi mumkin.
