«Real», «MYU» va «Man Siti» Rafael Leauga qiziqish bildirmoqda — manba
«Milan» qanot hujumchisi Rafael Leau «Manchester Yunayted», «Manchester Siti», «Liverpul» va Madridning «Real» klublari qiziqishlari doirasida turibdi. Ushbu jamoalar futbolchini shu yozda sotib olish imkoniyatlarini ko‘rib chiqmoqdalar. Bu haqda Daily Mail nashri xabar bermoqda.
Manbaning ma’lumotlariga ko‘ra, Italiya klubi o‘z budjetini muvozanatlash va moliyaviy cheklovlar doirasida faoliyat yuritish maqsadida bir qator yetakchi futbolchilari bo‘yicha takliflarni ko‘rib chiqishga tayyor.
Shu sababli, «Milan» portugaliyalik hujumchini 70 million yevro evaziga sotib yuborishi mumkin. Ta’kidlanishicha, avvalroq OAVda tarqalgan xabarlardan farqli o‘laroq, Leau «Barselona»ga taklif qilinmagan.
Joriy mavsumda Leau barcha turnirlar doirasida 27 ta o‘yinda ishtirok etib, 10 ta gol urdi va 3 ta golli uzatmani amalga oshirdi. Futbolchining klub bilan amaldagi shartnomasi 2028 yilning yoziga qadar mo‘ljallangan. Transfermarkt portali bergan ma’lumotlarga ko‘ra, futbolchining bozor qiymati 65 million yevroni tashkil etadi.
