«Real» «Manchester Siti»ning ikki nafar futbolchisiga qiziqish bildirmoqda
Madridning «Real» klubiga «Manchester Siti» markaziy himoyachisi Yoshko Gvardiol nomzodi taklif etildi. Ispaniya grandi ayni damda mudofaa chizigʻini kuchaytirishni oʻzining ustuvor vazifasi sifatida koʻrmoqda. Bu haqda AS nashri xabar tarqatdi.
Manbaning ma’lum qilishicha, hozirgi vaqtda xorvatiyalik futbolchining transferi boʻyicha «qaymoqranglilar» va «shaharliklar» oʻrtasida hech qanday muzokaralar olib borilayotgani yoʻq, biroq uning agentlari «Qirollik klubi»ga oʻtish variantini faol oʻrganishmoqda.
Shuningdek, «Real»ga «Manchester Siti» yarim himoyachisi va jamoa sardori Bernardo Silva nomzodi ham taklif qilingan. U yozda jamoani erkin agent maqomida tark etadi. Ta’kidlanishicha, portugaliyalik futbolchi faoliyatini «Barselona»da davom ettirish variantini rad etgan.
