«Real Madrid» «PSJ» hujumchisi Usmon Dembeleni sotib olmoqchi
Madridning «Real» klubi «PSJ» hujumchisi Usmon Dembeleni oʻz safiga qoʻshib olish imkoniyatlarini koʻrib chiqmoqda, deya xabar bermoqda TRT Spor.
«Real Madrid» prezidenti Florentino Peres shu yozda hujum chizigʻiga shov-shuvli xaridni amalga oshirishni maqsad qilgan. Klub tarkibni kuchaytirish doirasida bir nechta istiqbolli nomzodlarni oʻrganib chiqdi va Dembele asosiy variantlardan biri boʻlib turibdi. Hujumchini sotib olish yoʻllaridan biri sifatida Braim Diasning sotilishi koʻrilmoqda, u yozgi transfer oynasida klubni tark etishi mumkin.
Dembelening Parij klubi bilan amaldagi mehnat shartnomasi 2028-yilning yoziga qadar moʻljallangan.
Avvalroq OAVda «qaymoqranglilar» Madridning «Atletiko» klubi hujumchisi Xulian Alvaresni sotib olish boʻyicha urinishlarni yakunlayotgani haqida xabar berilgan edi.
Yakunlangan mavsumda Dembele «PSJ» safida barcha turnirlarda 37 ta oʻyin oʻtkazib, 19 ta gol urdi va 10 ta golli uzatmani amalga oshirdi. Futbolchi ayni paytda «Oltin toʻp»ning amaldagi sohibi hisoblanadi.
