«Real» La Ligada ketma-ket yettinchi gʻalabasini qoʻlga kiritdi
Ispaniya La Ligasining 23-turi doirasida «Valensiya»ni mag‘lub etgan Madridning «Real» klubi joriy mavsumdagi ketma-ket yettinchi g‘alabasini qo‘lga kiritdi. «Real» va «Valensiya» o‘rtasidagi bahs kecha, 8 fevral kuni bo‘lib o‘tdi.
Valensiyadagi «Mestalya» stadionida kechgan uchrashuvni Xorxe Bueno Mateo boshchiligidagi hakamlar brigadasi boshqarib bordi. Bahs mehmonlarning 2:0 hisobidagi ishonchli g‘alabasi bilan yakunlandi.
Ispaniya chempionatining 23 ta turidan so‘ng «Real Madrid» 57 ochko to‘plagan holda turnir jadvalida ikkinchi o‘rinni egallab turibdi. «Qaymoqranglilar» peshqadam «Barselona»dan atigi bir ochko ortda qolishmoqda.
Maʼlumot uchun, «Real» La Liga doirasidagi navbatdagi oʻyinini 14 fevral kuni «Real Sosedad»ga qarshi oʻtkazadi.
