«Real» Karvaxal oʻrniga Devid Ximenes variantini koʻrib chiqmoqda
Madridning «Real» klubi kelasi mavsumda Daniel Karvaxalning o‘rnini bosish uchun yoshlar jamoasi himoyachisi Devid Ximenes Korredor nomzodini ko‘rib chiqmoqda. Bu haqda Marca nashri xabar berdi.
«Real» sardori Karvaxal va bosh murabbiy Alvaro Arbeloa o‘rtasidagi munosabatlar biroz yumshagan bo‘lsa-da, 34 yoshli himoyachining klubdagi kelajagi so‘roq ostida qolmoqda. Uning amaldagi shartnomasi shu yozda yakuniga yetadi va rahbariyat yangi bitim taklif qilishi borasida kafolat bermagan.
Klub rejasiga ko‘ra, kelasi mavsumda Trent Aleksandr-Arnold asosiy o‘ng qanot himoyachisi bo‘ladi, Devid Ximenes esa doimiy ravishda asosiy tarkibga o‘tkaziladi. Ximenesning Madrid klubi bilan amaldagi shartnomasi 2027 yilgacha mo‘ljallangan bo‘lib, yaqin oylar ichida tomonlar bitimni uzaytirish bo‘yicha muzokaralarni boshlashni rejalashtirmoqda.
Ma’lumot uchun, Daniel Karvaxal 2013 yildan buyon «Real» sharafini himoya qilib keladi. U shu vaqtgacha 436 ta o‘yinda maydonga tushib, 14 ta gol va 65 ta golli uzatmani amalga oshirgan. Biroq joriy mavsumda u bor-yo‘g‘i 10 ta uchrashuvda qatnashdi va samarali harakatlar qayd etmadi.
