«Real» bosh murabbiy lavozimiga Arteta nomzodini koʻrib chiqmoqda
Madridning «Real» klubi jamoa bosh murabbiyligi lavozimi uchun ehtimoliy nomzodlarni o‘rganmoqda. Ular orasida Londonning «Arsenal» klubini boshqarayotgan ispaniyalik mutaxassis Mikel Arteta ham bor. Bu haqda TEAMtalk xabar bermoqda.
Manbaga ko‘ra, «qirollik klubi»ning amaldagi bosh murabbiyi Alvaro Arbeloa kelasi mavsumda ushbu lavozimda qolishi ehtimoli past. Shunga qaramay, hozirda «Arsenal» sport direktori Andrea Berta va Arteta o‘rtasida 43 yoshli mutaxassisning yangi shartnomasi bo‘yicha muzokaralar olib borilmoqda.
Arteta 2019 yil dekabr oyidan buyon «Arsenal»ni boshqarib kelmoqda. Uning qo‘l ostida londonliklar Angliya Kubogini va ikki marta Angliya Superkubogini qo‘lga kiritgan. Mutaxassisning «Arsenal» bilan amaldagi shartnomasi 2027 yil yozigacha mo‘ljallangan.
