«Real» «Barselona» va Negreira ishi bo‘yicha UEFAga 50 ming sahifalik material taqdim etdi
Madridning «Real» klubi Yevropa futbol assotsiatsiyalari ittifoqiga (UEFA) «Barselona»ning Ispaniya hakamlar texnik qo‘mitasi (CTA) sobiq vitse-prezidenti Xose Mariya Negreira bilan aloqalariga oid 50 ming sahifalik materiallarni taqdim etdi. Bu haqda AS xabar berdi.
Manba ma’lumotiga ko‘ra, «Qirollik klubi» «Barselona» Negreiraga pul to‘lagan 2001-yildan 2018-yilgacha bo‘lgan davrda qo‘lga kiritgan barcha sovrinlaridan mahrum etilishini istamoqda.
Eslatib o‘tamiz, 2023-yilda «Barselona»ga Ispaniya futbol qirollik federatsiyasida (RFEF) faoliyat yuritgan hakamlar texnik qo‘mitasi (CTA) sobiq vitse-prezidenti Xose Mariya Negreiraga to‘lovlar amalga oshirilgani bo‘yicha pora berish ayblovlari qo‘yilgan edi.
«Barselona» 2001-yildan 2018-yilgacha Negreiraga jami taxminan 8,4 million yevro to‘laganlikda ayblangan.
Kataloniya klubi versiyasiga ko‘ra, Negreira hakamlikka oid texnik hisobotlar tayyorlaydigan tashqi maslahatchi sifatida ishga jalb qilingan. CTA sobiq vitse-prezidenti esa hakamlarga ta’sir o‘tkazish maqsadida pora olganini inkor etmoqda.
