Rasman: «Real» Ferlan Mendi jarohat olganini eʼlon qildi

Madridning «Real» klubi rasmiy sayti orqali chap qanot himoyachisi Ferlan Mendi jarohat olganini ma’lum qildi.

«Klub tibbiyot xizmati tomonidan o‘tkazilgan tekshiruvlar natijasida Ferlan Mendida o‘ng oyoq son ikki boshli mushagining jarohati aniqlandi. Biz futbolchining holati va tiklanish jarayonini nazorat qilib boramiz», — deyiladi klub bayonotida.

Transfermarkt portali ma’lumotlariga ko‘ra, mazkur holat fransiyalik himoyachining «Real» safidagi 20-jarohati hisoblanadi.

Joriy mavsumda Mendi barcha turnirlar doirasida 5 ta o‘yinda maydonga tushgan. Futbolchining klub bilan amaldagi shartnomasi 2028 yilning yoziga qadar amal qiladi.

Nasrullo Karimov

Jurnalist