Rasman! “Liverpul” Virjil van Deyk bilan shartnomani uzaytirdi
FOТО: Liverpool.com
Angliyaning “Liverpul” klubi jamoa sardori Virjil van Deyk bilan shartnomasini uzaytirdi. Bu haqda mersisaydliklar matbuot xizmati xabar berdi.
Manbaga ko'ra, tomonlar o'rtasida 2027-yilning yoziga qadar mo'ljallangan yangi shartnoma imzolangan. Van Deyk yana ikki mavsum “qizillar” safida qoladi.
Eslatib o'tamiz, gollandiyalik himoyachi 2018-yilning yanvar oyidan buyon “Liverpul” safida o'ynab kelmoqda. Bu davr ichida u APL, barcha ichki kuboklar, Chempionlar Ligasi va klublar o'rtasidagi Jahon chempionatida g'olib chiqqan.
Joriy mavsum 33 yoshli himoyachi barcha turnirlarda 44 ta o'yin o'tkazib, 4 ta gol urdi va bitta golli uzatmani amalga oshirdi. Uning Transfermarkt'dagi narxi 28 million yevroga baholanmoqda.
Nasrullo Karimov
Jurnalist
