Rasman: Dino Toppmyoller «Ayntraxt»dan isteʼfoga chiqarildi
Frankfurtning «Ayntraxt» klubi bosh murabbiyi, 45 yoshli mutaxassis Dino Toppmyoller isteʼfoga chiqarildi. Nemis murabbiyi uchun Frankfurtdagi taxminan ikki yarim yillik faoliyat shu tariqa yakunlandi.
«Men bu jamoa bilan ishlashni va oldinda turgan qiyinchiliklarni birga yengib o‘tishni istardim. Biroq bu qarorni qabul qilaman. Har kuni «Ayntraxt»ga katta ishtiyoq va quvonch bilan kelardim. Hozirgi qoniqarsiz vaziyat borligini tan olaman, ammo so‘nggi ikki yarim yil ichida erishgan natijalarimiz bilan faxrlanaman. Afsuski, birga ishlashni davom ettira olmaymiz», — dedi Toppmyoller.
Ma’lum qilinishicha, vaqtinchalik bosh murabbiy vazifasini klubning U21 jamoasi bosh murabbiyi Dennis Shmitt va U19 jamoasi murabbiyi Aleksandr Mayer bajaradi. Ular birgalikda asosiy jamoaga rahbarlik qiladi.
Hozirda «Ayntraxt» Bundesligada 27 ochko jamg‘argan. Jamoa 38 ta gol urgan va 39 ta gol o‘tkazib yuborgan bo‘lib, bu ko‘rsatkich liga bo‘yicha eng yomon himoya natijasi hisoblanadi.
