Rasman: «Dinamo» urugvaylik himoyachi bilan shartnoma imzoladi
2026 yilgi mavsum oldidan tarkibni kuchaytirish ishlarini davom ettirayotgan «Dinamo» PFK legioner futbolchi bilan kelishuvga erishganini ma’lum qildi.
Dubayda yig‘in o‘tkazayotgan samarqandliklar safiga urugvaylik Mauro Brasil qo‘shildi. 26 yoshli legioner himoyachi bilan bir yillik shartnoma imzolandi. Mauroning so‘nggi klubi Urugvay chempionati vakili «Cerro-Largo» bo‘lib, 2025 yilda Klausurada 5-o‘rinni egallagan.
Mauro Brasil o‘z vaqtida Urugvay U20 yoshlar jamoasi safida 10ta o‘yinda maydonga tushgan. Shuningdek, u Urugvay milliy jamoasiga ham chaqirilgan bo‘lib, debyutini 2024 yilda Kosta Rika bilan o‘tkazilgan bahsda (0:0) markaziy himoyachi sifatida o‘tkazgan.
Maʼlumot uchun, Mauro Brasil «Dinamo» tarixidagi urugvaylik ilk o‘yinchi hisoblanadi.
