Rafael Benites faoliyatini Gretsiya chempionatida davom ettirishi mumkin
Ispaniyalik mutaxassisga 2,5 yillik shartnoma va yiliga 5 million yevro miqdorida maosh taklif etilgan.
FOTO: Getty Images
«Liverpul», «Napoli» va bir qator boshqa klublarni boshqargan ispaniyalik mutaxassis Rafael Benites «Panatinaikos» bosh murabbiyi etib tayinlanishiga yaqin turibdi. Bu haqda Sport24.gr nashri xabar bermoqda.
Manbaga koʻra, 65 yoshli mutaxassis hozirda Afinada boʻlib, klub xoʻjayini va prezidenti Yannis Alafuzos bilan muzokaralar olib bormoqda. Tomonlar shartnomaning yakuniy tafsilotlarini muhokama qilayotganlari aytilmoqda.
Benitesga 2,5 yillik shartnoma va yiliga 5 million yevro miqdorida maosh taklif etilgan. Hozircha faqat rasmiy hujjatlarni imzolash masalasi qolgan.
Eslatib oʻtamiz, Benitesning soʻnggi ishlagan jamoasi «Selta» boʻlib, u bu klubni 2023 yilning iyulidan 2024 yilning martigacha boshqargan edi.
Nasrullo Karimov
Jurnalist