Qashqadaryoda boks musobaqalari yakunlandi
“Yangi O‘zbekiston Olimpiya cho‘qqilari” sport musobaqalari doirasida tashkil etilgan “Qashqadaryo viloyati hokimi Olimpiadasi”ning boks bo‘yicha bellashuvlari yuqori saviyada o‘tkazilib, o‘z yakuniga yetdi.
Musobaqa davomida viloyatning barcha tuman va shaharlaridan tashrif buyurgan yosh charm qo‘lqop ustalari g‘oliblik uchun murosasiz va shiddatli janglar olib borib, o‘zlarining mahorati, matonati va jangovar tayyorgarligini namoyon etdi.
Yakuniy natijalarga ko‘ra, musobaqa g‘olib va sovrindorlari tantanali ravishda taqdirlandi. Taqdirlash marosimida Qashqadaryo viloyati boks federatsiyasi raisi Normo‘min Xolboyev, Qashqadaryo viloyat Sport boshqarmasi boshlig‘i Vahob Ro‘ziyev, hamda Milliy Olimpiya qo‘mitasining Qashqadaryo viloyati bo‘linmasi ijrochi direktori Erkin Vahidov ishtirok etdi.
Shuningdek, tadbir davomida xalqaro musobaqalarda munosib ishtirok etib, yuksak natijalarni qo‘lga kiritgan vohaning bir qator sportchilari ham alohida e’tirof etildi.
G‘olib va sovrindorlarga diplom, medal hamda esdalik sovg‘alari topshirildi.
