«PSJ» Dembele bilan shartnomani uzaytirmaydi — Al Helayfi
«PSJ» prezidenti Nasir Al Helayfi «Oltin to‘p» sohibi Usmon Dembele bilan shartnomani uzaytirish bo‘yicha muzokaralar jarayoni yuzasidan jurnalistlar savoliga javob berdi hamda futbolchi va uning talablariga munosabatini bildirdi.
Avvalroq OAVda Dembele tomoni parijliklarning dastlabki taklifini rad etgani haqida xabarlar tarqalgan edi. Ma’lumotlarga ko‘ra, «PSJ» futbolchiga yiliga 30 million yevrodan sal ko‘proq maosh taklif qilgan, biroq Dembele bu summani yetarli deb hisoblamay, ikki barobar ko‘p maosh talab qilgan.
«Klubimizda futbolchilar uchun maosh bo‘yicha aniq limit siyosati mavjud. Buni hamma biladi va barcha unga rioya qilishi kerak.
Usmon — klub afsonasi. Men Usmonni futbolchi sifatida ham, inson sifatida ham juda yaxshi ko‘raman. U ajoyib inson», — deya Al Helayfining so‘zlarini keltiradi RMC Sport.
