PSJ 18 yoshli Ibrohim Mbaye uchun 70 million yevro talab qilmoqda
“Pari Sen-Jermen” 18 yoshli vinger Ibrohim Mbayeni shu yozda sotishga tayyor. Biroq Parij klubi senegallik futbolchi uchun 70 million yevro talab qilmoqda. Potensial xaridorlar esa uning transfer qiymatini 50 million yevrodan oshmaydi, deb hisoblamoqda.
Mbayening o‘zi ko‘proq o‘yin amaliyotiga ega bo‘lishni istayotgani sabab klubini almashtirishga qarshi emas. Uning kelajagi bir necha haftadan beri noaniq bo‘lib turibdi va PSJ ham munosib taklif tushsa, futbolchini qo‘yib yuborishga tayyor.
18 yoshli vingerga asosiy da’vogarlardan biri “Liverpul” hisoblanadi. Xabarlarga ko‘ra, ingliz klubi Mbaye bilan shaxsiy shartlar bo‘yicha kelishuvga erishgan, biroq PSJ so‘rayotgan 70 million yevrolik narx transfer yo‘lidagi asosiy to‘siq bo‘lib turibdi.
Ma’lumot uchun, Mbaye PSJ bilan 2028-yilgacha mo‘ljallangan shartnomaga ega. Transfermarkt portali uning bozor qiymatini 30 million yevroga baholamoqda.
