Portugaliya milliy jamoasi tarixda ikkinchi bor Ronaldusiz raqib darvozasini toʻqqiz bor ishgʻol qildi
Portugaliya milliy jamoasi 2026 yilgi jahon chempionati saralashida Armanistonga qarshi o‘yinda (9:1) yirik g‘alaba qayd etib, bir uchrashuvda urilgan gollar bo‘yicha o‘z tarixiy rekordini takrorladi.
Uchrashuv Portugaliyadagi «Dragau» stadionida bo‘lib o‘tdi. Jamoa yetakchisi Krishtianu Ronaldu diskvalifikatsiya tufayli maydonga tusha olmadi.
Ilgari portugaliyaliklar faqat bir marta raqib darvozasiga to‘qqizta gol urishgan — Yevro-2024 saralashida Lyuksemburg 9:0 hisobida mag‘lub etilgandi. O‘sha o‘yinda ham Ronaldu qatnashmagandi.
Maʼlumot uchun, Portugaliya saralashning «F» guruhida birinchi o‘rinni egallab, 2026 yilgi jahon chempionatiga to‘g‘ridan to‘g‘ri yo‘llanmani qo‘lga kiritdi. Musobaqa kelasi yil yozda AQSH, Kanada va Meksikada o‘tkaziladi.
