Peshqadamlar to‘qnashuvida amaldagi chempion g‘alaba qozondi
Mamlakat XXIX milliy chempionati – Oliy liganing 3-tur bahslari kutilganidan ham qiziqarli va murosasiz kurashlar ostida o‘tmoqda. Har bir o‘yin kunidan keyin musobaqa jadvalida jamoalar o‘rin almashishayotgani, uchrashuvlarda kutilmagan natijalar qayd etilayotgani fikrimiz dalilidir.
3-turning markaziy uchrashuvida hali yangi mavsumda mag‘lubiyat nimaligini bilmay kelayotgan ikki peshqadam – BMB PFC va SQB jamoalari to‘qnash kelishdi. Har ikki jamoa maydonga faqat g‘alaba ishtiyoqi bilan tushib, juda yuqori sifatli, tomoshabop o‘yin namoyish etib berishdi.
Tezkor va qarama-qarshi hujumlar ostida o‘tgan bahsda uch karra O‘zbekiston chempioni BMB PFC futzalchilari yaratilgan vaziyatlardan unumli foydalanishdi. Bu uchrashuv yakunida qayd etilgan natijada ham o‘z aksini topdi.
