Paulo Dibala: «Messi va Ronaldu — maydondagi haqiqiy yirtqichlar»
«Roma» klubi yarimhimoyachisi Paulo Dibala zamonamizning ikki buyuk futbolchisi — Lionel Messi va Krishtianu Ronaldu haqidagi oʻz fikrlari bilan oʻrtoqlashdi. Sobiq regbi yulduzi Agustin Krevi bilan boʻlib oʻtgan suhbatda Dibala har ikki yulduz bilan ham bir jamoada (Ronaldu bilan «Yuventus»da, Messi bilan Argentina terma jamoasida) toʻp surgan kam sonli futbolchilardan biri sifatida ularning oʻziga xos jihatlariga toʻxtalib oʻtdi.
La Gazzetta dello Sport nashri iqtibos keltirishicha, Dibala ularning texnik jihatdan farq qilishini, biroq ruhiy tayyorgarlik borasida nihoyatda oʻxshash ekanliklarini taʼkidlagan.
Argentinalik futbolchining soʻzlariga koʻra, Messi va Ronaldu oʻzining kuchli raqobatbardosh ruhiyati va doimo gʻalaba qozonishga boʻlgan chanqoqligi bilan ajralib turadi. Dibala har birining oʻziga xos ustunliklari borligini eʼtirof etgan holda, ularni birgalikda maydondagi «haqiqiy yirtqichlar» deb atadi.
Maʼlumot uchun, Paulo Dibala 2022 yilning yozida erkin agent sifatida «Roma» safiga kelib qoʻshilgan edi. Yaqinda u oʻziga xos tarixiy natija qayd etdi: Dibala soʻnggi 20 yil ichida Italiya chempionatida 200 ta samarali harakat (gol va assist) koʻrsatkichini zabt etgan ilk xorijlik futbolchiga aylandi.
