O‘zbekistonlik futbolchi Abbosbek Fayzullayev CSKAning mavsumdagi eng yomon o‘yinchisi deb topildi
Rossiyaning Football24.ru sport portali Moskvaning CSKA klubining 2024/2025 yilgi futbol mavsumidagi ishtirokiga bag‘ishlangan tahliliy maqola chop etdi. Unda jurnalistlar jamoa o‘yinini tahlil qilib, futbolchilarga baho berdilar, kim yaxshi va kim yomon o‘yin ko‘rsatganini alohida qayd etdilar.
Jamoa darvozaboni Igor Akinfeev eng yuqori — 10 balldan 8 ball oldi. Nashr fikricha, darvozabon mavsumni yuqori saviyada o‘tkazgan va murakkab o‘yinlarda jamoani bir necha bor qutqargan.
Shu bilan birga, portal talqiniga ko‘ra, CSKAning eng yomon o‘yinchisi o‘zbekistonlik yarim himoyachi Abbosbek Fayzullayev bo‘ldi. Uning jamoa o‘yiniga qo‘shgan hissasi 10 balldan atigi 4 ballga baholandi. Jurnalistlar futbolchining oldingi mavsumlarga nisbatan sezilarli darajada pasayganini ta’kidladilar. "Pari NN"ga qarshi o‘yindagi yagona samarali uzatmasi bahorgi omadsiz davrni qoplab bera olmadi. Nashrning ta’kidlashicha, Fayzullayev o‘yinidagi pasayish muhokamalarga sabab bo‘lgan va klub shu yozda futbolchining kelajagi borasida muhim qarorlar qabul qilishi mumkin.
2024/2025 yilgi mavsum yakunlariga ko‘ra, CSKA 59 ochko to‘plab, Rossiya chempionatida uchinchi o‘rinni egalladi va bronza medallarini qo‘lga kiritdi. Jamoa barqaror natija ko‘rsatdi, biroq portalning qayd etishicha, Fayzullayev kabi ayrim futbolchilar o‘z salohiyatini to‘liq ro‘yobga chiqa olmadilar.
