Oʻzbekiston shaxmatchi tarixda ilk bor Nomzodlar turnirida ishtirok etadi
Goa shahrida Jahon kubogi uchun bahslar boʻlib oʻtmoqda.
FOTO: FIDE
Bugun, 19 noyabr kuni, Hindistonning Goa shahrida o‘tayotgan 2025 yil Jahon kubogi chorak final bosqichi yakunlandi. Turnir yarim finaliga O‘zbekistonning ikki grossmeysteri — Javohir Sindarov va Nodirbek Yakubboev yo‘l oldi.
Shu tariqa, ulardan biri tarixda ilk bor O‘zbekiston vakili sifatida Nomzodlar turnirida ishtirok etadigan shaxmatchiga aylanadi.
Yarim finalda Sindarov va Yakubboev bir-biriga qarshi bahs olib boradi. Demak, ulardan biri kamida ikkinchi o‘rinni egallashi aniq. Nomzodlar turniriga esa musobaqa yakunida eng yaxshi uchlik yo‘llanma oladi.
Jahon kubogining 11-bosqichi 31 oktabrdan 27 noyabrgacha Goa shahrida o‘tkazilmoqda. Turnirning mukofot jamg‘armasi 2 million dollarni tashkil qiladi.
Nasrullo Karimov
Jurnalist