Oʻzbekiston milliy terma jamoasi JCh-2026 davomida «Atlanta Yunayted» bazasida mashgʻulot olib boradi
Oʻzbekiston futbol assotsiatsiyasi va Amerikaning «Atlanta Yunayted» klubi ijtimoiy tarmoqlarda rasmiy bayonot berdi. Unga koʻra, Oʻzbekiston milliy terma jamoasi 2026 yilgi Jahon chempionati davomida ushbu AQSh klubining qarorgohida (bazasida) mashgʻulotlar olib boradi. Mazkur sport bazasi 10 iyundan eʼtiboran toʻliq hamyurtlarimiz ixtiyoriga topshiriladi.
«Xush kelibsiz, Oʻzbekiston», — deya qisqa va samimiy izoh qoldirgan «Atlanta» klubi oʻz sahifasida.
Eslatib oʻtamiz, boʻlajak musobaqada Oʻzbekiston milliy terma jamoasi «K» guruhidan oʻrin olgan boʻlib, guruh bosqichida quyidagi jamoalarga qarshi maydonga tushadi:
- Kolumbiya (18 iyun)
- Portugaliya (23 iyun)
- DR Kongo (28 iyun)
Maʼlumot uchun, JCh-2026 joriy yilning 11 iyunidan 19 iyuliga qadar boʻlib oʻtadi. Dunyoning eng nufuzli turniriga ilk bor uchta mamlakat — AQSh, Kanada va Meksika mezbonlik qiladi. Amaldagi chempion esa Argentina terma jamoasi hisoblanadi.
