O‘zbekiston jahon chempionatidagi debyuti oldidan qur’a sanasini bildi
FIFA 2026 yilgi futbol bo‘yicha Jahon chempionati guruh bosqichi qur’a tashlash marosimi qachon va qayerda bo‘lib o‘tishini e’lon qildi. ESPN nashri xabariga ko‘ra, ushbu tantanali tadbir 5 dekabr kuni AQShning Las-Vegas shahrida o‘tkaziladi.
Qizig‘i shundaki, Las-Vegas turnir mezbon shaharlari qatoriga kirmagan bo‘lsa-da, qur’a tashlash marosimi aynan shu yerdagi “Sphere” deb nomlangan noyob kontsert zalida bo‘lib o‘tadi. Bu inshoot dunyodagi eng yirik sferik binolardan biri bo‘lib, 17,5 ming tomoshabinni sig‘dira oladi va 50 ming kvadrat metrdan iborat ulkan ekran bilan jihozlangan.
Jahon chempionati 2026 yili 11 iyundan 19 iyulgacha AQSh, Kanada va Meksikada tashkil etiladi. Musobaqada 48 ta terma jamoa ishtirok etadi.
O‘zbekiston milliy terma jamoasi tarixda ilk bor mundial yo‘llanmasiga ega chiqdi. Endi esa yurtdoshlarimiz jamoamizning qaysi guruhda va kimlarga qarshi o‘ynashi bilan qiziqishmoqda. Qur’a natijalari ana shu savollarga javob beradi.
