O‘zbekiston futzal federatsiyasi hamda Quvayt futbol assotsiatsiyasi o‘rtasida hamkorlikni yo‘lga qo‘yish masalalari yuzasidan muzokaralar bo‘ldi
O‘zbekiston futzal federatsiyasi hamda Quvayt futbol assotsiatsiyasi o‘rtasida o‘zaro hamkorlikni yo‘lga qo‘yish masalalari yuzasidan muzokaralar bo‘lib o‘tdi.
Unda ikki mamlakat futzal uyushmalari o‘rtasida do‘stona aloqalarni mustahkamlash, milliy jamoalar o‘rtasida o‘rtoqlik uchrashuvlarini tashkil etish, shuningdek, hakamlar va mutaxassislar o‘rtasida tajriba almashish kabi muhim masalalar muhokama qilindi.
Muzokaralar natijasi o‘laroq, joriy yilning 19- va 21-dekabr kunlari Buxoro shahridagi “Universal” sport majmuasida bo‘lib o‘tadigan O‘zbekiston — Rossiya milliy terma jamoalari o‘rtasidagi futzal uchrashuvlarini quvaytlik hakamlar — Abdulaziz Al Rasaf hamda Yaser Almaqseed boshqarib borishadi. Shu munosabat bilan mazkur hakamlar bugun mamlakatimizga yetib kelishdi va ayni paytda Toshkent — Buxoro yo'nalishi bo'ylab parvozga chog'lanishgan.
Shuningdek, quvaytlik tajribali hakamlarni mamlakat milliy chempionati — Oliy liganing keyingi tur markaziy uchrashuvlariga jalb etish yuzasidan ham imkoniyatlar o'rganilmoqda.
Shu bilan birga, O‘zbekistonlik FIFA hakamlari Nikita Afinogenov va Anatoliy Rubakov esa Quvaytga uchib ketishdi. Ular Quvayt hamda Afg'oniston milliy terma jamoalari o'rtasidagi o'rtoqlik uchrashuvini boshqarib borishadi.
Ushbu hamkorlik ikki mamlakat futzalini yanada rivojlantirish, xalqaro tajriba almashish hamda o‘zaro ishonchni mustahkamlashga xizmat qilishi kutilmoqda.
