Osiyo futbol konfederatsiyasi (OFK) Infantinoning rejasiga norozilik bildirdi
Osiyo futbol konfederatsiyasi (OFK) ham Infantinoning rejasiga norozilik bildirdi
Osiyo futbol konfederatsiyasi (OFK) FIFA prezidenti Janni Infantinoning jahon chempionati huquqlarini xususiy investorlarga sotish rejasi yuzasidan rasmiy bayonot e’lon qildi:
«OFK bilan ushbu taklif bo‘yicha hech qanday maslahatlashuv o‘tkazilmagan. Bu kabi muhim masala tegishli va o‘rnatilgan boshqaruv kanallari orqali o‘rganilib, muhokama qilinishidan oldin jamoatchilikka oshkor qilinganidan hafsalamiz pir bo‘ldi.
Jahon futboli kelajagini mustahkamlaydigan innovatsion yondashuvlarni o‘rganish muhimligini tan olamiz, biroq bunday miqyosdagi va oqibatlarga ega tashabbuslar lozim darajadagi boshqaruv, shaffoflik va konstruktiv maslahatlashuv tamoyillariga asoslanishi kerak.
O‘yinning tijoriy va moliyaviy kelajagini o‘zgartirishi mumkin bo‘lgan qarorlar tegishli organlarga taqdim etilishidan oldin konfederatsiyalar, a’zo assotsiatsiyalar va boshqa manfaatdor tomonlar bilan atroflicha muhokama qilinishi shart.
OFK barcha manfaatdor tomonlarga taklifning huquqiy, tijoriy va strategik oqibatlarini to‘liq baholash uchun yetarli ma’lumot va vaqt berilishi kerak, deb hisoblaydi. Bu jahon futbol hamjamiyatining manfaatlarini himoya qilish va FIFA boshqaruv tizimiga bo‘lgan ishonchni mustahkamlash uchun zarurdir», – deyiladi OFK bayonotida.
