«Osasuna» — «Real» uchrashuvidan soʻng mezbonlarning ikki nafar muxlisi hibsga olindi
La Liganing 25-turi doirasida o‘tgan «Osasuna» va «Real Madrid» (2:1) jamoalari o‘rtasidagi bahsda ko‘ngilsiz voqea yuz berdi. Marca nashri xabariga ko‘ra, mezbon jamoa muxlislaridan biri madridliklar darvozaboni Tibo Kurtuaga qarata shisha idish uloqtirgan.
Belgiyalik posbon ushbu buyumni hakamga topshirgan, referi esa o‘z navbatida vaziyat haqida mas’ul shaxslarga ma’lum qilgan. O‘yin yakunlangach, stadion qo‘riqlash xizmati xodimlari huquqbuzarni aniqlash maqsadida tribunaga ko‘tarilgan, biroq bu muxlislar va xavfsizlik xodimlari o‘rtasidagi to‘qnashuvga aylanib ketgan. Vaziyatga milliy politsiya aralashishiga to‘g‘ri keldi va natijada ikki kishi hibsga olindi.
Ma’lumot o‘rnida, ushbu mag‘lubiyatga qaramay, «Real Madrid» 25 ta turdan so‘ng 60 ochko bilan turnir jadvalida peshqadamlikni davom ettirmoqda.
