Oʻrtoqlik oʻyini. Argentina safarda Puerto-Rikoni yirik hisobda magʻlub etdi
Argentina milliy jamoasi oʻrtoqlik uchrashuvi doirasida Puerto-Riko bilan oʻzaro bahs olib bordi va yakunda yirik 6:0 hisobida gʻalaba qozondi.
Argentinaliklar safida Aleksis Makallister va Lautaro Martines dublga erishdi. Yana bir golni himoyachi Gonsalo Montiel kiritgan boʻlsa, Puerto-Riko futbolchisi Stiven Echeverriya kutilmaganda oʻz darvozasini ishgʻol qilib qoʻydi.
Jamoa sardori Lionel Messi esa ikkita golga assistentlik qildi.
Maʼlumot uchun, Argentina navbatdagi oʻrtoqlik uchrashuvida Avstraliyaga qarshi maydonga tushadi. Uchrashuv 17 oktyabr kuni Toshkent vaqti bilan soat 16:00 da start oladi.
Oʻrtoqlik oʻyini
Puerto-Riko — Argentina 0:6
Gollar: Montiel (23), Makallister (14, 36), Echeverriya (avt. 64), Martines (79, 84).
Puerto-Riko — Katler, Paris (Rios, 73), Kardona (Sulia, 82), Kalderon, Echeverriya, Angking (O'Neyl, 61), Ydrach, Leon (Ernandes, 61), V. Rivera (Rossi, 82), Antonetti, R. Rivera (Dias, 73).
Argentina — Martines (Kambeses, 78), Montiel (Molina, 61), Balerdi, Otamendi (Rivero, 46), Gonsales, Simeone (Paz, 58), De Paul, Lo Chelso (Moreno, 46), Makallister, Lopes (Martines, 61), Messi.
