O‘FA Jaloliddin Masharipov bilan bog‘liq vaziyat haqida xabar berdi
O‘zbekiston milliy terma jamoasi futbolchisi Jaloliddin Masharipov AQShdagi yig‘in davomida bel qismidagi og‘riqlar sababli so‘nggi mashg‘ulotlarda, shuningdek, Kanada va Niderlandiyaga qarshi o‘rtoqlik uchrashuvlarida ishtirok etmadi.
So‘nggi haftalarda futbolchining bel sohasida og‘riqlar kuzatilib, dori-darmon va fizioterapiya muolajalari orqali uning holati yaxshilangan edi.
Biroq, keyinchalik og‘riqlar yana bezovta qila boshladi. O‘tkazilgan MRT tekshiruvi natijalariga ko‘ra, unda umurtqalararo disk churrasi qayta xuruj qilgani ma’lum bo‘ldi.
Ayni paytda Jaloliddin Masharipovning sog‘lig‘i bo‘yicha Milliy jamoa tibbiy shtabi tomonidan ish olib borilmoqda. Holat yuzasidan yakuniy tibbiy xulosalar olingandan so‘ng, qo‘shimcha ma’lumot taqdim etiladi.
