OChL 2’ga qur’a tashlandi — “Nasaf”ning guruhdagi raqiblari ma’lum bo‘ldi
18-avgust kuni Malayziyaning Kuala-Lumpur shahrida 2026/27-yilgi OChL 2 musobaqasining guruh bosqichiga qur’a tashlash marosimi bo‘lib o‘tdi. O‘zbekiston sharafini himoya qiladigan Qarshining “Nasaf” klubi “A” guruhidan joy oldi.
Qur’a natijasiga ko‘ra, “Nasaf” Birlashgan Arab Amirliklarining “Al-Vahda”, Quvaytning “Kuvayt SK” hamda Bahraynning “Al-Haldiya” klublariga qarshi bahs olib boradi.
G‘arb mintaqasining boshqa guruhlarida ham qiziqarli juftliklar shakllandi. “B” guruhidan “Al-Jazira”, “Gol Gohar”, “Al-Muharraq” va “Arkadag”, “C” guruhidan “Al-Taavun”, “Al-Rayyan”, “Al-Faysali” va “Al-Nahda” joy oldi. “D” guruhida esa “Al-Husayn”, “Al-Shorta”, “Al-Sib” va “Ist Bengal” o‘zaro kurash olib boradi.
Ma’lumot uchun, “Nasaf” 2026/27-yilgi mavsumda O‘zbekiston nomidan OChL 2 turnirida ishtirok etadi. Musobaqaning guruh bosqichida Qarshi klubi o‘z guruhidagi uchta raqibga qarshi uy va safar uchrashuvlarini o‘tkazadi.
