Noyer «Shalke»ning Bundesligaga qaytishini xohlamoqda
Myunxenning «Bavariya» klubi darvozaboni Manuel Noyer «Shalke»ni yana Bundesligada ko‘rishni istayotganini aytdi.
U ushbu klub tarbiyalanuvchisi bo‘lib, katta futbolga ham aynan «Shalke» safida kirib kelgan va 2006–2011 yillar oralig‘ida jamoa sharafini himoya qilgan.
«Albatta, bu juda ajoyib bo‘lardi. Ular bunga anchadan beri intilishmoqda va ehtimol yangi murabbiy bilan mavsum boshlanishi bunchalik yaxshi ketadi deb o‘ylamagan hamdir. Dastlab biroz shubhalar bo‘lgan bo‘lishi mumkin, ammo ular yaxshi sur’atga kirdi. Ular o‘zlariga sodiq qolishyapti, murabbiy va shtab ko‘rsatmalariga amal qilishmoqda.
Ularning mehnati ko‘rinib turibdi, endi hammasi o‘z qo‘llarida. Muhimi, «Shalke» diqqatni yo‘qotmasin va o‘z o‘yin uslubida davom etsin», — deya Noyerdan iqtibos keltiradi Sky Sport Germany.
Hozirda «Shalke» 31 ochko bilan Ikkinchi Bundesligada peshqadamlik qilmoqda.
