No‘mon Hasanov «Istaravshan» jamoasining bosh murabbiyiga aylandi
O‘zbekistonlik taniqli mutaxassis No‘mon Hasanov Tojikistonning “Istaravshan” klubi bosh murabbiyi etib tayinlandi.
Ta’kidlash joiz, bu Hasanovning “Istaravshan”dagi uchinchi faoliyati hisoblanadi. U avval 2022-yilda hamda 2024-yilgi mavsumda Tojikiston klubini boshqargan.
“Istaravshan” 2026-yilgi mavsumni muvaffaqiyatsiz boshladi. Jamoa dastlab Sherali Bobokulov qo‘l ostida harakat qildi, ammo olti turdan so‘ng atigi 3 ochko jamg‘arib, biror marta g‘alaba qozona olmadi. Keyin klub eronlik mutaxassis Amin Subhonini ishga taklif qildi, biroq u bilan ham uzoq muddatli hamkorlik amalga oshmadi.
Endi klub rahbariyati jamoani inqirozdan olib chiqish vazifasini No‘mon Hasanovga ishonib topshirdi. Mutaxassisdan asosiy maqsad — jamoaning natijalarini yaxshilash va “Istaravshan”ning Tojikiston oliy ligasidagi o‘rnini saqlab qolish.
Murabbiy O‘zbekistonda “Paxtakor”, “Qo‘qon-1912” va “Navbahor” kabi jamoalarda ishlagan. “Paxtakor”dagi faoliyati davomida u qariyb bir yil bosh murabbiylik qilgan, shuningdek “Navbahor”da Andrey Kanchelskisning yordamchisi sifatida faoliyat yuritgan.
